قار تؤكـن
علي‌اصغر اوجاقلي (سرين)
اونون يئكه كوره‌گي سينميشدي. دئدي: گئت اونا بير سس آت، گلسين. بير- ايكي ايل‌دن سورا قالخيب، چيخديم حيطه. كنديميزين يئيين اسن يئل‌لري، ياغان قار دنه‌لري‌ني سوووروردو دام‌لارين باشينا. كؤهنه دامين، دوواري ديبين‌ده سسيمي اوجالتديم: «عمي جان؛ حاجي بابانين كوره‌گي سيندي. گل گؤر نه دئيير. سني ايستير...» اونو گؤزله‌ديم. بؤركو باشيندا، قارا يون كوت- شالواري اوستونه قونان قار دنه‌لري ايله دامين قيراغين‌دان بويلاندي منه. بوينونا ساريديغي شال‌ين آرخاسين‌دان نه گؤي گؤزلري، نه ده بورما بيغ‌لاري‌ني گؤره بيلديم. «گئت ائوه، گليرم ايندي.» دئييب؛ گؤزدن ايتدي.
ايتگينليگي بئش- اون ايل اولدو. يا دا چوخ. دوزگون ياديم‌دا دئييل. من اوتوز ياشيم اولموش، حاجي بابام‌دا يئتميش ياشي‌ني بيتيردي. آنجاق بير آخشام چاغي عميم اؤزونو يئتيردي. يئتيشيب يورغونلوغون آلمادان، دام‌لارين اوستونه قالانان قارلاري گؤرونجه منه بوزاردي. «بالام! آغاندان آرتيرمازسان. او دا سن‌ين كيمي ارينگجيدي.» دئيه؛ يئكه كوره‌گي قاپي‌نين دالين‌دان گؤتوروب، گئتدي. من ده اونون داليجا. عميم‌ين آتماجاسي بئله آغير گلدي هئچ باشا گلمه‌ين! ايل‌لر بويو آغيرليغي‌ني چيگين‌لريم‌ده داشيديم.
حاجي بابامين بئش-آلتي ايل‌دن سورا صل‌له‌سي‌ني داشيديغيم كيمي. يئر- يوردو، آغاج‌لاري، دام- داش‌لاري قار- قيروو باسميشدي. رحمتليگي او شاختادا يويوب، گؤتوردوك قبريستانا. بير شيريق قبيره قويوب، قاييتديق.
«آي اوغلان! قالخ گؤر نه ايدي سسلندي؟» عميم اؤسكوره- اؤسكوره منه سس آتدي. دا سس‌دن- سؤزدن دوشموشدو، دام‌دان دوشدوگو كيمي. قولو قوينون‌دان آسيلي، آياغي آخساق دولانيردي. دولانماق يوخ، يوبانماق. اوزدن- گؤزدن دوشموشدو؛ اؤزو دئمه‌لي! نه گور سسين‌دن، نه ده ايتي سؤزلريندن ايز قالميشدي. ايزسيز عميم. آخي يئكه آياغ‌لاري‌نين ايزي حاجي بابامين آياغ ايزلري كيمي اوشاق قبيرينه بنزه‌ييردي. قارين اوستون‌ده يئرييينجه اوشاق قبيرلري باشدان- باشا دوزولوردو بيري- بيري‌نين داليسيجا. يوللانيرديلار كؤهنه دامين ديبينه‌دك. بئلم من ده آياق‌لاريمي ياواش- ياواش آتمالي ايديم. آخي چوخ قالميشديم اؤرگه‌شم. كنديميزين بولودلو هاواسي كيمي. هئي دولام، هئي ياغام. هئي دولام، هئي ياغام... آخي قيش گون‌لري‌نين قار-كوله‌گي هامي كَت‌دن قاباق بيزيم كنده گلردي! بئله قار-كولك اولاردي گؤز-گؤزو گؤرمه‌ين. عميم‌ين گؤرمز گؤي گؤزلري كيمي.
گئنه سس آتدي. «آي اوغلان؛ قالخ گؤر نه‌ايدي سسله‌ندي آخي؟ كارسان ائشيتميرسن...» بيردن بيره باغيردي باشيما. تئز قالخيب يئكه كورك اليم‌ده حيطه چيخديم. آياق‌لاريمي آغير-آغير آتيرديم. بلكه آياق ايزلريم قار اوستون‌ده يئر آچا بيلسينلر. كؤهنه دامين تيرلري سينيب، بئلي بوكولموشدو. آخير نفس‌لري‌ني آغير-آغير آلان و بئلي بوكوك ياتاغين‌دا قالان گؤرمز عميم كيمي.
***
يون: پشم
آرخا: دال، پشت
ايتگينليك: اوزاق‌دا اولماق، غيبت و گم شدن
اَرينگَج: (=اَرينجك) تنبل، سست
آتماجا: كنايه
صل‌له: تابوت، كجاوه
قيروو: شبنم منجمد
شيريق قبير: كيچيك قبير
قوينون‌دان: قوجاغين‌دان (قويون: قوجاق)
آخساق: عليل، ناقص، لَنگ
گور سس (gür səs): اوجا، هئيبتلي سس
ايزسيز: اثرسيز، نيشان‌سيز
اؤرگشمك: اؤيرنمك
بهمن 1391 – ائل (جمعه) گونو
