مصطفي رزاقي

سرويس‌دن اندي. هميشه كي كيمي برقي پله‌يه ساري يئريدي. ايش‌دن گليردي. برقي پله ده ائله بيل ايشله‌مكدن يورولموشدو. ياواش- ياواش اونو آپاردي اصلي كؤرپونون اوستونه. اوباشدا دا بير برقي پله‌دن انه‌جك ايدي. كؤرپونون آلتيندان گورها گور ماشين كئچيردي. چوخ سايلي گليب گئدن‌لرين آراسيندان بير گوشه‌ده كلوچه ساتاني هميشه گؤرردي. بير دولو كارتون آلتدا، بير كارتون اونون اوستونده، دايانيب كؤرپونون نرده‌سينه، آغزيني آچيب، كلوچه‌لر گؤرونور. سسله‌نير «سه تا هزار» (اوچو مين تومن).

بيز اوچ كيشي‌ايديك. كسمه يولوموزو آغاجليقدان سالديق. يولدا بير يولچويا توش گلديك. چيخاريب جيبيندن بير پارا كاغيذ وئردي بيريميزه. « بوردان اوزاقلاشاندان سونرا اوخويون. اوخوياندان سونرا ييرتين، تؤكون قارا آغاجين ديبينه.» دئيه؛ آغ ساققالينا هؤروب بيزه گولومسركن سؤز وئريب، سس- سميرسيز اندي چايلاغا طرف.

گيرديم سلماني‌يه. بير كس نوبه‌ده يوخويدو. اوتوران كيشي‌نين ايشي قوتارينجا، ال اوزاديب ماسا اوستونده‌كي درگي‌لرين بيريني گؤتوردوم. اؤز عكسيم اوستونده ايدي. تازا ورقله‌مه‌يه باشلاميشديم كي چاغيرديلار: «نوبه سيزيندي». اوتوردوم. آغ اؤرتوگو برك بوغازيمين دؤورونه باغلادي. مندن سوروشدو «هاردان ووروم؟» اليمله بوينومون آلتيني گؤرستديم. تيغ چكدي. قان بوغازيمدان سوزولدو آغ اؤرتوگون اوستونه. بير كيشي ايچه‌ري‌يه گيردي. آينادان باخديم. بير درگي گؤتوروب اوخوماغا باشلادي. قان سوزولوردو. من، آينادان اؤز عكسيم اوستونده اولان درگي‌يه باخيرديم.

قيشين اورتا چاغ‌لاري ايدي. اوزون گئجه‌نين بويو لاپار-لاپار ياغان قار، آغ اؤرتويونو دام-دووارا، كؤي-كوچه‌يه سرميشدي! كوچه‌لره قالانان قارين شاختاسي، قاري ننه‌لري كورسوده، كؤرپه ببه‌لري ايسه بئشيك‌ده دوندوروردو! زينت خالا ناهاري آسيب- آسماميش قيزيلجا نوخوشلوغونا اوغرايان 3ياشيندا قيزيني، 7ياشيندا اوغلونا، هر ايكي‌سيني ايسه آللاها تاپشيرير! حيط قاپي‌سيني باغلامادان بيرداها اوجا سسله تاپشيريغيني تكرار ائدير! اوغلودا، -نيگاران اولما آناجان اؤزوم سولمازدان يَليك اولارام!- دئيه جاواب وئرير! گئجه‌ني صوبحه دك خسته بالاسي‌نين باشيندا كئشيك چكن زينتين اوردلاري باتيب، گؤزلري چوخورا دوشموشدو! آخي اونون دار دونيادا، مؤعتاد اريندن ياديگار قالان ،پيشيم-پيشيم ايله بؤيوتموش بالاجا بالالاريندان باشقا بير كيمسه‌سي يوخ ايدي!

او گون‌لرده يولداش‌لارين بيريسي‌نين اوشاق‌لاري، يوخودا گؤروب، «بايرام» درگي‎سي ان اعلا، ان گؤزل كاغاذ ايله چاپ اولور. حتا بونودا دئيير: گلاسه كاغاذ ايله چاپ اولور. يولداش‌‎لارين بيري‌نين اوشاغي دئيير: يوخودا گؤردوم، خالق تورك شهرلرده و حتا آيري شهرلرده ده صف‌ده دوروب و بايرام آلماق ايستيرلر. دئيير: بايرامين تيراژي 999000000 چاتميشدي و اون بئش گون‌دن يوز، يوز اللي صحيفه‌‎ده چاپ اولوردو. اونلاردان سونرا يولداش‌لاردان بيري‌نين اوشاغي آرتيردي: اونلاردان سونرا 999000000دا آبونه‎سي وارايدي. بو اوشاق بايراما گؤره چوخ يوخولار گؤرموشدو. آما چوخو بورادا يازيلمير.